Huling pag-asa ng Pinay sa death row (Judicial review ng Indonesian SC)

HULING pag-asa ng isang Filipina para makaligtas sa hatol na kamatayan sa Indonesia ang judicial review ng Supreme Court (SC) doon.

Ayon kay Department of Foreign Affairs (DFA) Spokesperson Charles Jose, ito’y dahil una nang tinanggihan ni Indonesia President Joko Widodo ang hirit na clemency ng Filipinas para sa kababayang nahulihan ng droga.

Ani Jose, kahit pa magbago ang desisyon ng SC ng Indonesia, mananatiling guilty ang Filipina at malamang ay makukulong nang habambuhay.

“Ang purpose po nito (judicial review) ay tingnan lang kung appropriate ‘yung binigay na death sentence doon sa kanyang crime pero hindi na po de-determine ‘yung guilt or innoncence, established na po ‘yan,” paliwanag ni Jose.

“Umaasa na lang po tayo na ma-commute ‘yung kanyang death sentence to, at the very least, life imprisonment… Ito na po ‘yung last legal remedy natin, ‘yung judicial review, at commutation na lang po ang inaasahan natin diyan.”

Una nang ibinalita ni Jose na hindi natuloy ang firing squad sa Filipina nang magdesisyon ang district court sa Yogyakarta na ibalik sa SC ang kaso para sa judicial review. 

Hinihintay ngayon ang abiso ng SC kung kailan ito uumpisahan.

Ang Filipina na nasa death row ay 30-anyos single mother at may dalawang anak sa Filipinas.

Taon 2011 nang magtungo siya sa Malaysia para sana magtrabaho bilang household service worker.

May nakilala siya, na niyaya siyang pumunta ng Indonesia at binigyan ng maleta para dalhin. 

Ngunit ang hindi alam ng Filipina, may lamang ipinagbabawal na droga ang bahage.