Higit 80% ng kongresista kontra BBL (Kung walang pagbabago)

HINDI aaprubahan ng Kamara ang Bangsamoro Basic Law (BBL) nang walang pagbabago sa nilalaman nito.

Ikinatwiran ni Zamboanga Rep. Celso Lobregat, miyembro ng House Ad Hoc Committee on the BBL, naniniwala ang karamihan ng mga kongresista na labag sa Saligang Batas ang ilang probisyon ng panukala. 

“As is na walang bago, siguro mga 80% to 90% ng congressman ay hindi papayag na ipapasa ‘yan (Bangsamoro Basic Law),” ani Lobregat.

Kabilang sa pinaniniwalaan aniya nilang unconstitutional o labag sa Saligang Batas ang sinasabing pagbubuo nang hiwalay na constitutional offices at police force ng Bangsamoro, pati ang obligasyong makipag-coordinate rito ang militar bago magsagawa ng operasyon.

Matatandaan, ito rin ang posisyon ni House Ad Hoc Committee on the BBL Chairperson Rep. Rufus Rodriguez, nagsabing nagkasundo na ang mga kongresitang tanggalin ang nasabing mga probisyon.

Dagdag ni Lobregat, kahit pumasa sa Kongreso ang BBL, hindi rin ito papasa sa Supreme Court (SC).

“Kung ipapasa namin na as is, e siguradong pagpunta, sa Supreme Court, maideklara itong unconstitutional, sayang lang.”

Gayonman, sa pagplantsa nila sa panukala, aminado si Lobregat na ang maiiwang tanong ay kung tatanggapin ito ng Moro Islamic Liberation Front (MILF).