Tirador ng motorsiklo nasukol

NASUKOL nang pinagsanib na puwersa ng Bulacan Police Provincial Office at Philippine National Police Highway Patrol Group ang isang pusakal na tirador ng mga motorsiklo sa operasyon sa Plaridel, Bulacan kamakalawa.

Sa ulat mula kay Senior Supt. Ferdinand Divina, Bulacan police director, kinilala ang naarestong suspek na si Jomel P. Marcelino, alyas Doro, itinuturong lider ng notoryus na motorcycle theft ring na kumikilos sa Central Luzon.

Sa operasyon ng mga awtoridad sa Brgy. Agnaya, sa naturang bayan, nakompiska sa suspek ang isang itim na Motorstar motorcycle (4119QA), sinasabing pag-aari ng isang Joan Bautista.

Nabatid na habang nakaparada ang nasabing motorsiklo ng biktima sa bahagi ng Brgy. San Juan, Malolos City, bigla na lamang itong nawala sa kinaroroonan noong Pebrero 22.

Nakompiska rin sa pinaglulunggaan ng suspek ang 20 pang motorsiklo, tatlong tricycle at walong sidecar na pinaniniwalaang puro karnap.

Pansamantalang inilagay sa kostudiya ng PNP-HPG ang motorsiklo para sa beripikasyon.

Micka Bautista