HATAW! D'yaryo ng Bayan hatawtabloid.com
HINDI kataka-taka kung maraming magulang at teen-ager ang tumututok sa Bagito ni Nash Aguas. Paano’y wastong paggabay ng mga magulang sa kanilang mga anak ang ibinabahagi ng teleseryeng Bagito na handog ng Dreamscape Entertainment Television mula sa ABS-CBN2.
Bagamat may mga maseselang usapin o tema ang Bagito, isang eye opener ito sa mga magulang sa posibleng pagdaanan ng kani-kanilang anak. Tiyak na malaki ang maitutulong ng Bagito para mailayo sa maling landas ang mga kabataang tulad ng ginagampanang karakter ni Nash.
Samantala, mainit na tinutukan ng sambayanan ang pilot episode ng Bagito. Pumalo kasi ito agad sa ratings. Sa datos mula sa Kantar Media nakakuha ang Bagito sa national TV rating ng 27.2%, o mahigit doble laban sa katapat nitong programa sa GMA na Coffee Prince (11.3%).
Wagi rin ang Bagito sa social networking sites tulad ng Twitter na naging hot topic sa netizens ang serye at naging worldwide trending topic pa ang official hashtag ng programa na #Bagito1stCrush. Naging nationwide trending topic naman ang isa sa mga bida nito na si Ella Cruz.
“Ginawa po namin itong ‘Bagito’ para maturuan at maging mulat ang mga bata at magulang sa mga totoong nangyayari sa mga kabataan ngayon,” ani Nash kung bakit niya tinanggap ang role.
“Dapat pong abangan ng viewers ang mga pagdaraanan ni Drew, dahil ituturo po ng ‘Bagito’ sa buong pamilya, lalo na po sa mga ka-edad namin, ang mga maaaring mangyari kapag nakagawa ka ng isang pagkakamali,” sambit naman ng ka-loveteam ni Nash na si Alexa Ilacad.
Tutok lang gabi-gabi sa ABS-CBN2 para sa Bagito na napapanood bago mag-TV Patrol.
ni Maricris Valdez Nicasio
