HATAW! D'yaryo ng Bayan hatawtabloid.com
COTABATO CITY – Tiniyak ni Senador Ferdinand “Bongbong” Marcos Jr., chairman ng Senate committee on local governments, sa stakeholders sa isinagawang unang ‘out-of-town public hearing’ para sa panukalang Bangsamoro Basic Law (BBL), na pakikinggan ng Senado ang lahat ng mga pananaw at rekomendasyon na may kaugnayan at magiging resulta ng detalyadong talakayan hinggil sa makasaysayang panukala.
“We are now getting into the details of this proposed law and we want to make sure that at the end of this process, the committee will be able to report out a measure that would ensure just and lasting peace in Mindanao,” pahayag ni Senador Marcos.
Sinabi ng senador na welcome din sa kanya ang impormasyon mula kay ARMM Assistant Executive Secretary Atty. Rasul Mitmug kaugnay sa pagbubuo ng ARMM-GPH-MILF transition committee upang mabatid ang administrative concerns na idadaing ng mga empleyado ng ARMM, local governments, at iba pang stakeholders.
Ang katulad na mga hinaing ay kinabibilangan ng magiging tulong ng pamahalaan sa mga empleyado ng ARMM na maaaring maapektohan ng transition process, kaugnay sa pagbuwag sa ARMM at paglilipat ng function nito sa Bangsamoro Transition Authority na ang mga miyembro ay itatalaga ng Pangulo.
Sinabi ni Dr. Pearlsia Dans, chairperson ng Regional Executives and Assistant Secretary of ARMM, tinatayang 33,000 ARMM personnel ang nangangamba sa magiging epekto ng pagsasabatas ng panukala sa kanilang trabaho.
Tiniyak ni Atty. Mismug kay Senador Marcos na kabilang ito sa mga paksa na tinalakay ng ARMM-GPH-MILF transition committee.
Hiniling ni Senador Marcos sa ARMM-GPH-MILF transition committee na isumite sa kanyang komite ang resulta ng kanilang mga pagpupulong upang agad makabuo nang malinaw na mga rekomendasyon kung paano mareresolba ang nasabing isyu.
“It is our role to study all of these details so that we can achieve our goal of bringing about lasting peace not only in Mindanao but also for the country,” diin ni Marcos.
