Gilas kontra Iran ngayon

PAGKATAPOS ng kanilang pahinga kahapon, balik-aksyon ang Gilas Pilipinas sa men’s basketball ng 17th Asian Games sa Incheon, Korea, mamaya kontra Iran.

Magsisimula sa ala-una ng hapon ang laro kung saan parehong pasok ang dalawang bansa sa quarterfinals.

Ngunit kung si Gilas coach Chot Reyes ang tatanungin, kailangan pa rin ng panalo ang Gilas para hindi sila mahirapan sa kanilang makakalaban sa quarterfinals.

Bukod pa rito, nais ni Reyes na gantihan ang pagkatalo ng Gilas kontra Iran, 85-71, sa finals ng FIBA Asia Championships noong isang taon na ginanap dito sa ating bansa.

Kagagaling ang Gilas sa 85-76 panalo kontra India noong isang araw kung saan nakalamang ang mga Pinoy sa pamamagitan ng 16-0 na ratsada sa unang quarter pa lang ng laro.

Nakabalik ang India sa mga huling minuto ng laro ngunit sinuwerte pa rin ang Gilas dahil napilay dahil sa sobrang pagod ang shooter ng India na si Singh Pratham, bukod sa kinapos ng oras ang mga Indian.

“We were lucky to have that good start,” wika ni Reyes. “But after going 16-0, India basically beat us the rest of the way. If they were a lot fresher and not playing their fourth game in four days, it would have been a much difficult time for us. We are happy to come out with this win. Hopefully, we continue to improve.”

Umaasa si Reyes na manghahalimaw sa ilalim si Marcus Douthit na gumawa ng 14 puntos kontra India.

Matatandaan na hindi naglaro si Douthit sa finals ng FIBA Asia dahil sa pilay sa paa nang tinalo ng Gilas ang South Korea sa semifinals kaya dinomina ni Hamed Haddadi ang ilalim para sa Iran.

Mapapanood ang laro ng Gilas at India nang live sa TV5 at may replay sa parehong istasyon sa alas-8 ng gabi. (James Ty III)\