HATAW! D'yaryo ng Bayan hatawtabloid.com
HINALAY ng 66-anyos matandang lalaki sa loob ng motel kamakalawa ang 5-anyos batang babaeng namamalimos sa Caloocan City.
Arestado ang suspek na si Dominador Pagulayan, residente ng Morning Breeze Subdivision, Bagong Barrio ng nasabing lungsod, nahaharap sa kasong rape in relation to R.A. 7610 (Child Abuse).
Batay sa ulat ng Women’s and Children’s Protection Desk ng Caloocan City Police, dakong 4 p.m. kamakalawa nang maganap ang insidente sa loob ng Venus Hotel sa kanto ng 2nd Avenue, Grace Park ng nasabing lungsod.
Salaysay ng biktimang itinago sa pangalang Janine, bigla na lamang siyang hinila ng suspek sa loob ng nasabing hotel at pinagsamantalahan ang kanyang murang katawan.
Makaraan ang insidente ay agad umuwi ang biktima at isinumbong sa mga magulang ang ginawa ng suspek.
Agad humingi ng tulong sa mga awtoridad ang mga magulang ng biktima na nagresulta sa pagkakadakip sa suspek.
Hinala ng mga magulang, matagal nang minamanmanan ng suspek ang biktima habang namamalimos at nang makatiyempo ay dinala sa motel.
(ROMMEL SALES)
