HATAW! D'yaryo ng Bayan hatawtabloid.com
ARESTADO ang dating manlalaro ng Metropolitan Basketball Association (MBA) sa anti-drug operation sa Brgy. Ugong, Sta. Cruz, Laguna dakong 6 a.m. kahapon.
Pakay mismo ng operasyon si Reggie Gutierrez, dating manlalaro ng Laguna Lakers team, dahil nasa target list siya ng mga drug personality sa lalawigan.
Unang inakala ng mga tauhan ng Laguna PNP Intelligence Branch Special Action Team na negatibo ang pagsalakay sa bahay ng suspek dahil ang buntis niyang live-in partner lang ang nadatnan doon.
Ngunit makalipas ang isa’t kalahating oras, nakarinig ang mga awtoridad ng pag-andar ng sasakyan at naispatang tatakas na si Gutierrez kasama sina Darryl Calma at Dino Bueno na sangkot din sa pagbebenta ng droga sa lalawigan.
Nasukol sila nang mag-panic at mahulog sa gutter ang kotse at hindi na nakapalag pa.
Narekober mula sa sasakyan ang isang baril at ilang drug paraphernalia habang higit sa P60,000 halaga ng shabu ang nasamsam sa bahay ng suspek.
Sinasabing muntik nang maging manlalaro sa PBA si Gutierrez kung hindi bumagsak sa drug test.
