Appeal ni Bistek, lalong lumalakas

ni Vir Gonzales

NAPAKAGANDA ng naisipang treatment ni Mayor Herbert Bautista para sa mga kaibigang press ng kanyang nanay si Mommy Baby. Darling of the press ito noong araw! Sa kanilang bahay sa New York sa Cubao, bihirang araw na walang bisitang press si Mommy Baby. At palaging may pameryendang sopas o goto kaya.

Noong magpa-birthday si Mayor sa mga press, sinabi niyang higit siyang kailangan ngayon ng mga kaibigan ng parents n’ya, dahil hindi na bumabata ang mga reporter. Nagbiro nga si Mayor ‘yung dating nakikita n’ya ngayong may tungkod na, ‘yung iba naman, malago raw buhok ngayon hindi na.

Nagkatawanan ang mga press na dumalo sa party na birthday ni Mayor na ginanap sa Valencia residence ni Mother Lily Monteverde. Naroon nga si Mother na sumilip muna bago pumunta sa kanyang meeting.

Masaya ang naturang party. Marami siyang magagandang balak para sa Quezon City. At sa darating na film festival bukod tangi siyang nakaisip magbigay ng pa-birthday party para sa press bawat buwan ng taon. Marunong  siyang mag-scattered ng blessing sa kapwa. Sinubi nga niya, lapitan siya ng mga press, kapag may problema, lalo’t may kinalaman sa kalusugan. Hindi na raw bumabata ang tao, kaya’t kailangang mag-ingat.

Sabi pa ni Mayor, may humirit na nagtanong, kung totoo bang madalas siyang magpadala ng bulaklak kay Kris? Hindi raw. So, malinaw ang lahat, walang roses na galing kay Mayor na ipinadala kay Kris Aquino. May mga nagkokomento habang tumatanda si Bistek, lalong lumalakas ang appeal sa chicks, ano bang secret ni Mayor? Hindi niya sinasabi, dahil secret nga raw.