HATAW! D'yaryo ng Bayan hatawtabloid.com
SUMIPOT sina LA Tenorio at Japeth Aguilar sa exhibition game ng Barangay Ginebra San Miguel at ng LG Sakers ng Korea noong isang gabi sa Smart Araneta Coliseum.
Kahit galing sila sa airport mula sa biyahe nila patungong Espanya para sumabak sa Gilas Pilipinas sa group stage ng FIBA World Cup ay nagbigay din sila ng suporta sa Gin Kings na natalo sa Sakers, 81-76.
Parehong naniniwala sina Tenorio at Aguilar na kaya ng Gilas na masungkit ang gintong medalya sa men’s basketball sa darating na Asian Games sa Incheon, Korea, kahit wala si Andray Blatche na hindi pinayagan ng Olympic Council of Asia na maglaro sa Gilas.
“I think, even without Andray, we can still compete naman,” wika ni Tenorio. “Kung worse comes to worst, we can play All-Filipino after our experience in Spain where we won over Senegal kahit na-foul out si Dray. Sanay nga kami at mas malakas ang loob namin.”
“As long as we do our job well, wala kaming dapat matakot (sa Asian Games),” dagdag ni Aguilar. “Basta sa akin naman, kung ano ang maitutulong ko sa team, kaya kong gawin. Mahalaga ang role ko sa Asian Games kasi it’s a big shoe to fill. We can compensate on other aspects. Depende iyan kay coach (Chot Reyes).”
Nagpapahinga muna ang mga manlalaro ng Gilas at babalik sila sa ensayo bukas para paghandaan naman ang Asian Games na gagawin sa Incheon, Korea, mula Setyembre 19 hanggang Oktubre 4.
(James Ty III)
