Pakistan lupaypay sa Pilipinas

BINALATAN ng Philippine men’s team ang Pakistan, 3-1 upang umakyat ng bahagya sa team standings sa nagaganap na 41st World Chess Olympiad sa Tromso, Norway kahapon.

Pumitas ng tig-isang puntos sina GMs John Paul Gomez at Jayson Gonzales sa boards 2 at 4 habang nakipaghatian ng puntos sina GM Julio Catalino Sadorra at FM Paulo Bersamina sa boards 1 at 3 ayon sa pagkakasunod para ilista ang 10 match points at lumanding ang Pilipinas sa pang 63rd place matapos ang ninth round.

Pinayuko agad ni Gomez (elo 2526) si IM Shahzad Mirza (elo 2268) sa 43 sulungan ng Nimzo-Indian habang pinasadsad ni player coach Gonzales (elo 2405) si Mudasir Aqbal matapos ang 34 moves ng English opening.

Mahabang 73rd moves ng Queen’s Gambit bago napapayag si Sadorra (elo 2590) na makipag-draw kay IM Mahmood Lodhi (elo 2335) habang nagkasundong maghati ng puntos sina Bersamina at Ali Ahmad Syed matapos ang 43 tira ng Torre-Attack.

Makakaharap ng Pinoy woodpushers sa 10th at penultimate round ay ang No. 85 seed Bolivia.

(ARABELA PRINCESS DAWA)