JM, aminadong pinagsisisihan ang ‘pagkawala’ sa showbiz

MARAMI ang nagulat sa biglang pagkawala ni JM De Guzman. Kasagsagan kasi iyon ng kanyang career. Kaya naman aminado si JM na pinagsisisihan niya ang ‘pagkawalang’ iyon sa showbiz.

Paano’y napakaraming opportunities talaga ang pinakawalan niya. “May mga panghihinayang na kung given the opportunities na binigay sa akin, kung pinagbutihan ko lang talaga and inalagaan ko ng sobra-sobra may possibility po,” ani JM sa isang interbyu sa kanya ng abscbnnews.com.

Ang mga kasabayan niya’y magaganda na ang career ngayon at tunay namang umalagwa. “Hindi ko sinasabing sure na mararating ko rin ang narrating nila, pero may possibility na makapunta ako roon. May panghihinayang pero hindi ko pa rin naman sinusukuan na subukan parin.”

Sinabi pa ni JM na na marami siyang natutuhan sa dalawang taong pagkawala niya sa showbiz. Pero iginiit niyang hindi totoong ang dati niyang girlfriend na si Jessy Mendiola ang dahilan kung bakit siya sobrang na-depressed sa buhay.

“Hindi si Jessy. Naging malaking inspirasyon pa nga siya. Noong naging kami naging inspirasyon siya sa akin. Hindi para bumagsak or para mapunta sa kung saan ako napunta kasi wala naman siyang ginawang masama, wala siyang ipinakitang masama. Actually na-inspire niya nga ako noon until now,” paliwanag ng aktor.

Samantala, muling nagbabalik si JM sa showbiz at tiniyak niyang for good na ito ngayon.

“Sisiguraduhin ko na po na hindi na ako magloloko. Kung maglaho man ako, hindi ko na ‘yun intention. ‘Yun na lang talaga ako, hanggang doon na lang talaga siguro ang career ko. Pero in terms kung pag-uusapan ‘yung sadyain na aalis, hindi ko na gagawin ‘yun. Sisiguraduhin ko na ‘yun,” giit niya.

Kasalukuyang gnagawa ni JM ang legal drama series na Ipaglaban Mo ng ABS-CBN2 at mapapanood din natin siya sa isa sa mga tampok na istorya ng Maalaala Mo Kaya.