HATAW! D'yaryo ng Bayan hatawtabloid.com
ni Ed de Leon
NATUWA pa naman kami, dahil sabi nga namin siguro gusto talaga nilang makatulong sa mga kababaihan, kaya naglabas pa ng isang serye ng mga picture ang abogado ni Claudine Barretto na parang tutorial o pagtuturo kung paano ang tamang paggamit ng concealer at make up.
Ipinakita iyong mukha ni Claudine na akala mo nasapak ni Pacquiao, kasi talagang halos sugat iyong ibaba ng dalawang mata. Pero kung titingnan mo ang picture, mukhang pantay na pantay talaga ang sugat. Parang sukat eh. Tapos, noong masabi na kung paanong maitatago iyon sa pamamagitan ng concealer at make-up, nagsabi siya, “bahala na kayong humusga kung sino ang gumawa niyon”.
Naku, eh napakahirap palang hulaan kung sino ang gumawa niyon. Definitely hindi si Manny Pacquiao. Hindi rin namin mahulaan kung ang gumawa niyon ay si Belo o si Calayan o ibang doctor. Iyon palang sugat na iyon sa ilalim ng mata ni Claudine ay hindi naman dahil nasapak siya eh. Iyon pala ay dahil sa isang medical procedure dahil nagparetoke siya.
Nadesmaya naman ako, akala ko walang retoke ang mukha ni Claudine, dahil hindi ba panay ang parinig niya sa ate niyang si Gretchen Barretto na sinasabi niyang ang mukha ay tadtad na ng saksak ng botox. Eh siya rin naman pala nagparetoke noon pang 2010.
Dahil sa palagay nga nila, nagkaroon ng malisya ang make-up at concealer tutorial na inilabas ng abogado ni Claudine, inilabas naman ng kampo ni Raymart ang iba pang pictures na ganoon din na magpapatunay na iyon ay dahil sa isang medical procedure. Meaning, kuha iyon matapos siyang magparetoke ng kanyang mukha para mas magmukha siyang payat.
Ito tapatan na ito ha, kung kami kasi ang tatanungin, lugar na pareho naming kakilala iyang dalawang iyan. Mas kapani-paniwala si Raymart.
Noong una ngang kaaway niya ang mga kapatid lang niya, kinampihan pa namin iyang si Claudine sa gulo nila eh kasi parang kawawa siya eh. Noong bandang huli lumabas na ang maraming nakapagdududang statement niya. Paano mo naman siyang paniniwalaan?
