HATAW! D'yaryo ng Bayan hatawtabloid.com
APAT na sunog ang halos sabay-sabay nangyari kahapon na ikinamatay ng apat paslit na magpipinsan (dalawang magkapatid), ikinaabo ng isang ancestral house at pabrika; habang nasugatan at nalapnos ang isang Nigerian national sa Quezon Province at Metro Manila.
Sa unang ulat, dalawang magkakapatid (magpipinsan na paslit) ang namatay nang makulong sa loob ng nasusunog nilang bahay sa Brgy. Bulakin, Dolores, Quezon.
Kinilala ang mga biktima na sina Ella Medrano, 8 anyos; John Mark Medrano, 6; Mark Rebenito, 4; at ang sanggol na si Jasmine Rebenito, 12 buwan gulang.
Sa imbestigasyon ng mga tauhan ni Insp. Madonna Abang, napag-alamang nagsindi ng kandila ang panganay na kapatid ng dalawang biktima na si Juana Rebenito, 13-anyos, na iniwanan niya dakong 9:00 p.m.
Makalipas ang 45 minuto, kanyang napansin na nasusunog ang kanilang bahay kaya’t nagtatakbo siya palabas upang humingi ng tulong.
Pagbalik ni Juana, natupok na ang buong bahay na yari sa pawid, kawayan at sawali.
Kasamang nasunog ang kanyang dalawang kapatid at dalawang pinsan na pawang mga paslit.
Ayon sa ulat, wala ang mga magulang ng mga bata na kapwa nagtatrabaho sa lungsod ng San Pablo nang maganap ang sunog.
nina Raffy Sarnate/BETH JULIAN
P2-M NAABO SA STA. MESA FIRE
TINATAYANG nasa P2 milyong ari-arian ang naabo nang masunog ang dalawang palapag na bahay sa Sta. Mesa, Maynila, Sabado ng madaling-araw.
Ayon kay, SFO3 John Joseph Jalique ng Manila Fire Department, dakong 3:30 a.m. nang magsimulang masunog ang ikalawang palapag ng bahay sa 4709 Old Sta. Mesa.
Umabot sa ikaapat na alarma ang sunog na naapula dakong 5:48 a.m.
Inaalam ng arson investigator ang sanhi ng sunog na nakaapekto sa 30 pamilya at tumupok sa P2 milyon ari-arian.
(leonard basilio)
GARMENT FACTORY NATUPOK
Nasunog ang isang garment factory sa Industrial Road kanto ng San Francisco St, sa Karuhatan, Valenzuela City, Sabado ng umaga.
Tinatayang aabot sa 90 porsiyento ng Mega Fields Garments, ang nilamon ng apoy na sumiklab dakong 7:00 a.m.
Sa panayam kay Alan Alvarez, isa sa mga empleyado ng pagawaan, nang kanyang makita ang apoy, agad siyang bumaba sa unang palapag para patayin ang main switch.
Ngunit hindi na siya nakabalik sa ikalawang palapag dahil mabilis na lumaki ang apoy.
Agad nilisan ng mga stay-in na empleyado ang pagawaan na karamihan ay walang naisalbang gamit.
Dakong 8:33 a.m. naapula ang apoy.
Inaalam ng mga awtoridad ang halaga ng pinsala at sanhi ng sunog.
(ROMMEL SALES)
NIGERIAN SUGATAN SA QC FIRE
Sugatan ang isang Nigerian national sa naganap na sunog sa isang Christian church, kanto ng Kamuning Road at T. Gener St., sa Kamuning, QC.
Dakong 6:45 a.m. nang matupok ang bahagi ng simbahan ng Team Ministries International na napula dakong 7:05 a.m. Tinatayang P500,000 ang natupok na ari-arian.
Ani Supt. Jesus Fernandez ng QC Fire Department, nag-umpisa ang sunog sa kwarto ng Nigerian na si Gerry Gideon, 29-anyos, nagkalapnos sa braso at nahirapan huminga kaya agad dinala sa kalapit na Delgado Hospital.
(ALMAR DANGUILAN)
