HATAW! D'yaryo ng Bayan hatawtabloid.com
ni Maricris Valdez Nicasio
HINDI kataka-taka na nag-trending ang pilot episode ng Ikaw Lamang na may hastag na #IkawLamangGrandPilot noong Lunes dahil talaga namang kamangha-mangha ang bagong proyektong ito ng Dreamscape Entertainment ng ABS-CBN2. Umani rin ng papuri ang mga batang nagsisiganap dito na sina Zaijian Jaranilla, Louise Abuel, Alyanna Angeles, at Xyriel Manabat.
Bukod sa istorya, pinuri rin ang production design, scoring, at siyempre ang mga acting ng mga nagsisiganap.
Sa totoo lang, hindi nagkamali ang Dreamscape sa pangunguna ni Mr. Deo Endrinal sa pagkuha kay Zaijian para gumanap na batang Coco Martin. Kuhang-kuha ni Zaijian ang ibang gawi ni Coco at lalong ipinakita rito ni Zaijian ang galing niya sa pag-arte na una na nating napanood sa May Bukas Pa.
Kapuri-puri rin ang tatlo pang batang sina Louise (batang Jake Cuenca), Alyanna (batang Kim Chiu), at Xyriel (batang Julia Montes) na kapag nag-uusap-usap ay parang mga matatanda na. Sa mahahabang linya, naide-deliver nila ng maayos at naiaarte ng tama.
Sa napanood naming episodes sa advance screening ng Ikaw Lamang, masasabi naming maaari nang ihanay si Zaijian kina Coco, Piolo Pascual, at John Lloyd Cruz dahil sa galing at lalim ng acting na ipinakita nito.
Sa mga susunod pang gabi, lalong hahangaan tiyak ng mga manonood si Zaijian dahil lalo pang magpapamalas ng galing sa pag-arte ang batang ito. Kahit madalas niyang kaeksena ang magaling at premyadong aktres na si Cherry Pie Picache, hindi ito nagpakabog gayundin sa eksena nila nina Tirso Cruz III at John Estrada.
Kaya tumutok lagi sa ABS-CBN para mapanood ang master-seryeng Ikaw Lamang pagkatapos ng Honesto.
