Tapos na ang relasyong Binay-Estrada!

MUKHANG natuldukan na ang relasyong VP Jojo Binay at Mayor Erap Estrada.

Malinaw kasi na hindi na nag-uusap ang dalawang lider oposisyon ng bansa at tiyak ang kasunod na nito ay ang banatan na sa media ng magkabilang panig.

Naniniwala tayong maglalabasan na ng sama ng loob ang dalawa at tiyak na kaabang-abang ito sa publiko dahil isa na namang lihim ang mabubunyag na pabor na pabor hindi lamang sa administrasyon kung hindi maging sa mamamayan.

Maliwanag na hindi lamang isyu ng Central Market ang pinagtalunan nina Erap at Binay dahil putok na putok na ang balitang tatakbong muli si Erap bilang pangulo ng bansa sa 2016.

‘Yan ang matagal na nating sinasabi sa pitak na ito dahil magmula noong pumutok ang pork barrel scam ay naglaho nang parang bula ang tambalang Binay-Jinggoy sa 2016.

Sa maikling salita, itinapon na ng kampo ni Binay si Jinggoy dahil mabaho na ang name niya sa madla kaya’t bilang isang beteranong politiko ay natural na maghanap ng taong makatutulong sa kanyang karerang politikal.

Tiyak na may mga sulsol pa sa dalawang lider na huwag nang magbati dahil personal din interes nila ang namimirati lalo’t may kanya-kanyang bata sina Estrada at Binay.

Isa lamang ang pinatunayan ng mga pangyayari at iyan ang kasabihang, walang permanenteng kaibigan sa politika kung hindi puro pansariling interes lamang ang nangingibabaw.

Marami pang kaabang-abang na balita sa kampo ng oposisyon dahil tiyak na susunod namang guguho ang pagkakaibigan ng Estrada at Enrile.

Abang-abang lang pag may time!

Alvin Feliciano