HATAW! D'yaryo ng Bayan hatawtabloid.com
PATAY ang isang 38-anyos ama, nang magresponde sa nagaganap na kaguluhan sa kanilang lugar, pero sinamang-palad na nabaril at napatay ng bagitong pulis habang sugatan ang dalagita niyang anak sa Parañaque City, nitong Sabado ng gabi.
Nalagutan ng hininga bago idating sa Parañaque Doctors Hospital si Joseph Arquillo, ng 030 Blk 3, Cherry East Compound, Brgy. Sun Valley, sanhi ng mga tama ng bala sa iba’t ibang bahagi ng katawan, habang nilalapatan pa ng lunas ang 17-anyos anak na si Carliza na nahagip ng bala sa kaliwang paa.
Kinilala ni Parañaque police chief Sr. Supt. Ariel Andrade ang suspek na si PO1 Gerald Garcia, nakatalaga sa Regional Public Safety Batallion-National Capital Region Police Office (RPSB-NCRPO) na tumakas matapos mabaril si Arquillo.
Sa ulat ng pulisya, dakong 9:45 ng gabi, tinawag ng mga kapitbahay ang biktima para umawat sa nagaganap na gulo sa Blk 5 Avenue, Cherry East Compound.
Nagresponde rin sa kaguluhan ang pulis na si Garcia.
Anang barangay tanod na si Willy Abrematia, naayos na ang gulo nang magreklamo ang kaanak ng pulis na nasugatan.
Nagalit umano ang pulis at sa hindi malamang dahilan, ang biktima ang pinagbuntunan at pinagbabaril sa harap ng dalagitang anak.
Narekober sa pinangyarihan ng krimen ng mga tauhan ng Scene of the Crime Operatives (SOCO) ang isang basyo at isang hindi pumutok na bala mula sa kalibre .40 na baril.
(JAJA GARCIA)
