HATAW! D'yaryo ng Bayan hatawtabloid.com
BALITA natin ‘e maraming PNP career officials ang tumatanggi nang magpa-deploy sa Pasay City.
Hindi dahil sa hindi nila kaya ang trabaho kundi dahil sa kawalan ng pakialam umano ng Pasay City local government na tumulong para bawasan kung hindi man matuldukan ang sunod-sunod na pamamaslang, holdapan,illegal na droga, ambush sa nasabing lungsod.
Gaya ng pinakahuling insidente ng ambush sa isang Chinese family at sinundan agad ng pagpaslang sa isang pulis ng riding in-tandem
Pinalad na makaligtas sa kamatayan ang Chinese family kahit na nga umabot ng walong bala ng kalibre .45 ang ipinaulan sa kanila. Pero ang pulis na kaangkas ang dalawang anak ay tuluyang namatay dahil sa mga tama ng bala sa ulo at iba’t ibang parte ng katawan.
Isang araw ang pagitan ng dalawang insidente pero parehong malapit sa Andrews Avenue naganap.
Huwag na po natin bilangin ang mga nakaraang krimen na ang mga suspek ay pawang riding in-tandem din.
Ganyan po katindi ang PEACE & ORDER ngayon sa Pasay City.
Pang-ilang HEPE ng Pasay PNP na nga ba si Sr. Supt. Florencio Ortilla sa ilalim ng adminsitrasyon ni Mayor Antonino Calixto?!
Tatlo lang daw ang kinahihinatnan ng mga hepe ng pulisya sa Pasay.
Una, kung straight ang hepe at nakahandang linisin ang Pasay City, t’yak hindi sila magkakasundo ng mga taga-City Hall, t’yak na rin na agad siyang mapapalitan – ibig sabihin sibak agad.
Ikalawa, kung ayaw naman makaaway ang city hall lalo na ang Kamaganak Inc., at gustong makapamulsa, kakapalan na lang niya ang mukha niya, t’yak tatagal ang panunungkulan ng chief of police sa Pasay at makikinabang pa sa nga konsesyon ng ‘TATLONG B as in B-ETLOG.’ Kaya lang may basbas ka man ng Mayor pero nakukunsumi na ang NCRPO sa talamak na krimen t’yak sibak ka pa rin.
At ikatlo, kung eengot-engot lang ang chief of police at panay lang ang ‘YES’ sa city hall, bukod sa mababatikan ang kanyang career bilang police official ‘e t’yak PURO BUKOL pa ang kanyang aabutin … pero he can stay longer naman as chief of police.
‘Tama ba ako Kernel Ortilla?!
By the way, ano ba ang nangyari sa anim na yunit ng video karera na nakompiska mo na hindi lang pinag-uusapan sa City Hall kundi pinagtatawanan pa?!
Nang makompiska mo raw ay anim na VK machine, nang iharap kay Yorme CalixTONG ‘este’ Calixto sa flag raising ‘e apat na yunit na lang tapos wala nang motherboard (na-chop chop na)?!
Hik hik hik…anak ng tungaw!
Kernel Ortilla, hindi ka naman daw komedyante pero parang nagpapatawa ka raw?
Tsk tsk tsk …
Sa totoo lang, ang sabi ng city hall insiders natin, ‘yang riding in-tandem ay parang ‘pangkaraniwang’ pangyayari na lang sa kanilang lungsod, hindi lang sa Pasay City kundi sa buong Metro Manila, pero ang higit na nakatatakot at dapat pag-ingatan ng mga taga-Pasay ay ang CORRUPTION IN-TANDEM (father & son tandem?), na suportado ng KAMAGANAK Inc., kakontsaba ang TATLONG B-ETLOG (Bing,Boyet & Bong).
Gusto raw mapantayan ng Pasay CORRUPTION IN-TANDEM ang NAPOLES PORK BARREL scam?!
Gustong mapantayan sa dami ng nadambong?!
‘Yun ‘yon o!
LTFRB CHAIRMAN ATTY. WINSTON GINEZ ‘WAG KANG NINGAS-KUGON!
MUKHANG wala sa ayos ang nakagisnang pamumuno ni Land Transportation Franchising and Regulatory Board (LTFRB) chairman, Atty. Winston Ginez.
Reactive ang style ng kanyang serbisyo publiko. Kung kailan mayroong malaking aksidente ay saka lamang niya pinakikilos nang husto ang kanyang mga tauhan para gawin ang mga karampatang inspeksiyon at monitoring sa mass transportation gaya ng public utility vehicles and buses (PUVs and PUBs).
Nakita natin ang padron na ito ni Chairman Ginez sa kaso ng ‘lumipad’ na Don Mariano bus sa Skyway at ngayon nga ay ‘yung ‘dumayb’ na Florida bus patungong Bontoc sa Mt. Province.
Kaya ngayon lang nila natuklasan na ang nasabing Florida bus ay hindi na pala pag-aari ng Florida bus mismo.
Ibig sabihin nagkakaroon ng bentahan ng mga PUBs na hindi namo-monitor ng LTFRB?
Ano po ang epekto nito sa commuters?!
Sa ganito pong sistema ng bilihan o pasahan ng prangkisa, naisasakpripisyo ang kalidad ng bus at ng serbisyo para sa publiko.
Nagbabayad nang tama ang mga pasahero sa isang bus na kilalang may maayos at ekselenteng maintenance para sa malayuang biyahe. Ibig sabihin, gustong tiyakin ng pasahero ang kaligtasan ng kanilang paglalakbay kaya sa mga maaayos na bus sila sumasakay.
Lalo na nga d’yan sa Mt. Province na ang pagtungo ay parang paghahanda na rin sa kamatayan.
Tsk tsk tsk …
Pero dahil ang bentahan ng bus at ng prangkisa ay hindi na-monitor ng LTFRB, hindi na rin malalaman ng pasahero kung ang sinakyan nilang Florida bus ay maayos pa rin ang maintenance.
‘Yan ay base sa ipinalalabas ngayon ng LTFRB na mayroon daw diperensiya ‘yung bus kaya hindi nakontrol ng driver.
Bukod pa ‘yan do’n sa kapabayaan ng local government unit na walang ano mang road signs ang nasabing blind curve at walang road hamper sa gilid ng kalsada.
Kung talagang seryoso ang LTFRB, lalo na ang kasalukuyang chairman na si Atty. Ginez, na mabawasan ang mga aksidenteng kinasasangkutan ng land transportation, dapat e mas masugid at maging mahigpit sila sa pag-iinspeksiyon ng mga bus.
Unahin na nila ‘yung mga bumibiyahe sa malalayong probinsiya — northbound at southbound — lalo na ‘yung mga dumaraan sa gilid ng bundok.
Sa ganyang paraan man lang ay makaramdam ng kaligtasan ang mga pasahero, ‘di po ba Chairman Ginez?
Umaksyon kayo nang maaga Chairman Ginez …hindi ‘yun ‘pag may naganap nang aksidente!
Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
