Ducut sisibakin!

Mukhang si Energy Regulatory Commission (ERC) chairman Zenaida Ducut na ang next target ng Malakanyang na sipain.

Dito na kasi patungo ang kilos ng mga bataan ni PNoy lalo’t ang complainant ni Ducut na grupong Akbayan ay kilalang tuta ng Palasyo.

Maging ang paghahain ng complaint ng Akbayan kay Ducut sa Office of the President ay lubhang nakapaghihinala dahil pwede naman nilang ihain ang reklamo sa dating kongresista ng Pampanga sa Office of the Ombudsman kaysa sa opis ni PNoy.

Sa salitang kalye, all system go ang operation laban kay Ducut, isa sa mga taong naiwan ni Ate Glo, kaya’t malinaw na ang gusto nilang mangyari ay ma- short cut ang proseso.

May statement pa nga si Communication Sec. Sonny Coloma na may option pa raw si Ducut at ito nga ay ang pagbibitiw sa pwesto.

Malinaw sa ikinikilos at ikinukumpas ng Palasyo na ayaw nila kay Ducut kaya’t sa halip na kastiguhin din nila ang kanilang mga bataan kagaya ni Energy Sec. Jericho Petilla dahil sa pagtataas ng singil ng kuryente ay pinuno ng ERC ang kanilang tinarget.

Halatang-halata naman kasi ang kilos ng Malakanyang sa isyu ni Ducut at iyan ay ang makontrol ang buong ahensiya na may kinalaman  sa enerhiya kaya’t dito dapat maging mapagmasid ang publiko.

Doble bantay ang dapat gawin dito ng tao dahil kapag nangyari sa atin ang scenariong gusto ng Palasyo ay tiyak na magigisa tayo ng buong-buo ng mga ganid na negosyante sa bansa na may kontrol sa power industry.

Naka-drawing na ang lahat ng hakbang ng Palasyo at iyan ang ating abangan dahil malinaw naman sa pagbubulgar ni Senador Bong Revilla, na “what PNoy want’s, PNoy gets.

Alvin Feliciano