‘Mission Impossible’ sa Port of Cebu

SA KABILA ng panlulupaypay ng “players” sa Port of Cebu ng Bureau of Customs sanhi ng sobrang kahigpitan at kabagalan ng pagproseso ay nagsisilbing matinding dagok ang itinokang collection target sa unang buwan ng Year of the Wood Horse na umabot sa P997-MILYON.

Nitong Enero 13 nga lang ay nakakolekta lamang ng kabuuang P474,350,549 ang Port of Cebu sa ilalim ng bagong pamumuno ni retired Brig. Gen. Roberto T. Almadin bilang district collector.

Patuloy pa rin inirereklamo ng “players” ang sobrang kahigpitan kung kaya tumatagal ang kanilang transaksyon sa Aduana sa Sugbo. Nananatiling nakatiwangwang ang mga posisyon ng mga hepe ng Port Inspection Division (PID), Entry Processing Unit (EPU), at Assessment Division na nagbibigay ng kalitohan at pagkadesmaya ng transacting public.

Taliwas ito sa bilis ng “trade facilitation” na pinauso noon ni Atty. Lourdes Mangaoang na dating district collector at sinundan nina Ricardo “Boysie” Belmonte at Atty. Ronnie Silvestre, at maging ng maiksing panunungkulan bilang OIC district collector ni Atty. Paul S. Alcazaren, na parehong laging nalalampasan ang kanilang mga collection target.

Kunsabagay ay bago pa lamang sa kanyang posisyon si General Almadin na mas nahasa sa tinatawag ng mga Cebuano na “panggubatan” (larangan ng digmaan) bilang magiting na sundalo at opisyal.

Tahimik nga lang si General Almadin ngunit wika nga ay matinik na sanggang-dikit naman ni Maj. Camilo “Bong” Cascolan, Jr., na siyang hepe ng customs police sa Port of Cebu dahil pareho silang mayroong “military background.”

Ayon sa ating bubuyog, hindi mahilig sa publicity si General Almadin kung kaya hindi niya ipinaalam sa media ang kanyang kusang-loob na pagtulong sa mga biktima ng superbagyong “Yolanda” sa mga bayan ng Tabogon, San Remigio, at Medellin sa northern Cebu na maraming mga bahay ang nawasak.

Ngunit kung maaabot ang collection target ngayon buwan ng Enero ay MISSION IMPOSSIBLE ito para kay General Almadin na sinasabing napakahusay sa “counter-terrorism strategies” noong siya ay nasa militar pa.

Hindi naman daw “militarization” ang nangyayari ngayon sa Bureau of Customs, bagama’t maraming mga negosyante at importers ang umaangal sa kapraningan, este, daming tseteseburetse sa mga transaksyon.

Harinawa ay maaabot pa rin ng Port of Cebu – kahit ‘di malampasan gaya dati – ang collection target ngayong Enero lalo na’t Chinese New Year sa Enero 31 na ikalimang kaarawan din ni Star, ang aking nag-iisang anak na babae.

Junex Doronio