HATAW! D'yaryo ng Bayan hatawtabloid.com
NAGBABALA at nanawagan ang isang concerned group na mga mamamayan kay Manila Mayor Joseph Estrada na mag-ingat sa mga pambobola ng Koreans businessmen sa kanya at alok na libre o donasyon na mga LED screens sa mga lamp post sa lungsod ng Maynila dahil sa posibleng mabigat na kapalit nito sa huli.
Ang Global Gold Inc., ay nangako kay Estrada na kanilang ipagkakaloob ng libre ang kabuuang 10,000 lamp posts sa lungsod ng Maynila at bilang panimula ay nakatakda nilang simula ngayong gabi (Enero 17) ang pagpapailaw sa 100 solar-powered LED lights sa Rajah Solaiman Park sa Manila.
Batay sa impormasyon ng grupo tinanggap ni Estrada ang alok na donasyon dahil sa bukod sa bankrupt ang lungsod ay isa din sa pangako nito noong kampanya ay palitan ang mga lamp post.
Tinukoy pa ng grupo na tila nakalimutan suriin ng mga tiga-lungsod ang background ng Global Gold dahil sa kanilang pagsisiyasat natuklasan nila na naitayo at nabuo lamang ang kumpanya nitong nakalipas na July 10, 2013 at bago lamang din ang mga empleyado nito matapos ang kanilang pag-uusap verbally ni Estrada.
Natuklasan pa ng grupo na ang Global Gold ay mababawi nila ang ginastos sa kanilang donasyon at sila ay kikita pa sa pamamagitan ng advertisement gamit ang mga LED screen sa 10,000 lamp post.
Ngunit ang mas pinangangambahan ng grupo na kanilang napag-alaman na gagamitin ang mga lamp post na ito ng mga Koreana upang sila ay makapag-usap sa kapwa nila Korean gamit ang kanilang lenggwahe.
Tinitiyak na magiging daan nila ang mga lamp post na ito para mailagay ang mga ads ng Moonies isang religious group sa Korea.
Kilala ang Moonies sa paghihikayat sa mga taong hindi nila mananampalataya na ang hindi nila kapanalig ay pawang mga satanas at kailangan nila ang tulong ng mga pinuno ng Moonies na para sa grupo lubhang mapanganib. (NIÑo Aclan)
