HATAW! D'yaryo ng Bayan hatawtabloid.com
WALANG magaganap na rotating brownouts sa Luzon dahil matatag ang kasalukuyang power supply.
Ito ang tiniyak kahapon ni Pangulong Benigno Aquino III sa gitna ng pangambang makararanas ng brownouts kapag hindi naipatupad ng Manila Electric Company ang bigtime power rate hike.
“Well, naninigurado tayong hindi magkakaroon ng rotating brownouts dahil, technically, meron tayo talagang enough of a supply, if not, even a surplus currently at least for Luzon,” anang Pangulo matapos dumalo sa groundbreaking ceremony sa San Gabriel power plant sa Batangas City.
Mas kaunting brownouts naman ang magaganap sa Mindanao sa darating na summer dahil aniya sa mga hakbang na isinagawa ng Department of Energy (DoE) para tugunan ang suliranin sa power supply.
Pansamantalang pinigil ng 60-day temporary restraining order (TRO) ng Korte Suprema ang P4.15 power rate hike ng Meralco noong Disyembre kaya’t nagbabala ang kompanya na magkakaroon ng rotating blackouts dulot nito.
Kaugnay nito, hindi pinaboran ng Pangulo ang suhestyon na bawiin ng Kongreso ang prangkisa ng Meralco dahil hindi pa naman tapos ang pagsisiyasat ng Department of Energy (DOE) sa posibleng sabwatan ng power generators at Meralco kaya lumobo ang presyo ng koryente.
“Sa akin parang premature naman yatang magsabi niyan, pero naintindihan na natin na magandang paraan ‘yan para makakuha ng headline,” sabi pa ng Presidente.
Ipinanukala ni Kabataan partylist Rep. Terry Ridon na bawiin ang prangkisa ng Meralco dahil sa pagkabigong magkapag-suppy ng abot-kayang halaga ng koryente at i-take-over ng gobyerno ang operasyon ng kompanya.
(ROSE NOVENARIO)
