HATAW! D'yaryo ng Bayan hatawtabloid.com
ISANG munhant operation ang isinagawa ng Manila Police District (MPD) laban sa dating barangay kagawad sa Pasay City na isinangkot sa panghoholdap ng riding in tandem sa isang negosyante sa Malate, Maynila kamakailan.
Kinilala ang biktimang si Bobby Velasco, may-ari ng Café de Malate, habang tinukoy ang suspek na si Ramon Villareal Buragay, ex-kagawad sa Pasay City, kasama ang isa pang suspek na nagsilbing look-out.
Ayon kay Velasco, nangyari ang insidente noong Miyerkoles, dakong 3:00 ng hapon, matapos niyang ipasiya at ng kanyang arkitekto, hindi nagpabanggit ng pangalan, na tingnan ang site ng bago niyang branch na nasa Agoncillo Street.
Habang papunta sa lugar, isang lalaking naka-motorsiklo ang pumarada pero hindi nito pinatay ang makina. Maya–maya ay inilabas ng lalaki ang isang .45 kalibreng baril , ikinasa at itinutok kay Velasco at kasama nito saka nagdeklara ng holdap.
Tumalikod si Velasco at tinangka nitong tumakbo pero mabilis na nahatak ng suspek ang kanyang kuwintas na may diamond, habang kinuha ang bag ng kanyang contractor na naglalaman ng P60,000, pampasuweldo sa kanyang mga tauhan.
Dumiretso sina Velasco sa MPD – Paco detachment at nagreklamo at kinilala niya ang suspek base sa photo files ng pulisya.
Nalaman na ang suspek ay dati nang naaresto sa katulad na krimen at nakalaya lamang sa pamamagitan ng piyansa.
Nalaman na marami nang nabiktima ang riding-in-tandem at ang iba ay hindi na nagrereklamo sa pulisya.
(leonard basilio)
