Tiba-tiba ang Big 4 ng Parañaque sa Baclaran

ANG Big 4 raw ng Parañaque ang nagpapasasa sa sangkatutak na pwesto sa Baclaran.

Ito pala ang dahilan kung bakit hindi maalis-alis ang mga sagabal na pwesto sa siyudad na pinamamahalaan ni Mayor Edwin Olivarez.

Isang Lani raw ang lider ng Big 4 na kinabibilangan ng kanyang mga alagad na sina Eva, Arnold at Anton.

Bukod sa arawang tara ay talaga namang hindi na kumukuha ng permit sa city hall ang mga vendor dahil ang lagi raw pinangangalandakan ni Lani at ng grupo niya ay siya ang bahala sa permit at kay mayor.

Napag-alaman rin na may pwesto na sina Lani sa Baclaran at bukod sa nagbebenta ng iba’t ibang produkto ay mayroon pang pinauupahang pwesto.

Bihasa sa dilang bihasa si Lani dahil ganyan rin ang raket niya at ng kanyang mga alipores sa isang mall na nasunog sa northern part of Metro Manila.

Iyan ang dapat bantayan ni city council ng Parañaque at ni Mayor Olivarez dahil baka imbes umunlad ang kanilang siyudad ay mabaon pa sa utang dahil ang kanilang mga kinuhang tagapamahala ay puro tulisan.

‘Yan ang dapat tutukan ni Jojo L, isang  saradong bata ni Olivarez

***

Dapat nang sibakin ni PNoy si Justice Sec. Laila de Lima.

Sangkatutak na kasi ang sablay ni Aling Laila at ang pinakahuli nga nito ay ang ginawang pagpapalaya kay Antonio Leviste, dating gobernador ng Batangas.

Malinaw naman kasi sa batas na si Laila ang boss ng Board of Pardons and Parole kaya’t marami ang nagsasabing imposibleng hindi alam ni PNoy at ng kalihim ang ginawang pagpapalaya kay Leviste, na uncle ng kasalukuyang bise gobernador ng Batangas, at kapartido ng pangulo sa Liberal Party.

Sa maikling paliwanag, naghuhugas lamang ng kamay sina de Lima at PNoy dahil walang naniniwala na wala silang blessing sa pagpapalaya kay Leviste.

‘Yan ang ilan lamang sa mga panggago ng administrasyong ito dahil ang tingin nila sa Pinoy ay puro bobo.

Alvin Feliciano