Nina, ‘di raw nagpapasuweldo ng PA?

NALUNGKOT kami sa kuwento sa amin ng taong malapit sa rating PA (personal assistant) ng singer na si Nina dahil hindi raw niya pinasuweldo ng halos isang taon.

Kasambahay daw kung tratuhin ni Nina ang nasabing PA na sunod-sunuran sa kanya at minsan ay nalilipasan na raw ng gutom sa rami ng utos ng tinaguriang Soul Siren.

Kuwento sa amin ng taong nagmalasakit at malapit sa PA, ”awang-awa ako ateng, isipin mo, magkano lang naman ang suweldo ng PA tapos hindi man lang binayaran at nagtrabaho sa kanya (Nina) ‘yung tao ng matagal na panahon?

“Kaya noong ikuwento sa akin lahat, nag-iba ang tingin ko kay Nina, kasi ang porma-porma niya, may pera naman siya maski paano dahil may mga raket naman siya, ano ba naman ‘yung ibigay mo ang suweldo ng tao?”

Nagpaalam na raw ang PA kay Nina dahil hindi na nito matagalan ang trato bukod pa sa hindi nasusuwelduhan at pumayag naman daw ang singer.

Baka naman hinihintay lang talaga ni Nina na magpaalam na ang PA niya para hindi na niya suwelduhan?

Anyway, tinawagan namin kahapon ang kapatid at manager ni Nina na si Dew Anne at tinanong namin ang tungkol sa nasabing PA na hindi nasusuwelduhan.

“Ay, hindi po totoo, imposibleng hindi siya susuwelduhan,” bungad na sagot sa amin ng kapatid ni Nina.

Dagdag sabi pa, “Per month ang bayad sa kanya at kumukolekta siya tuwing kinsenas at katapusan at imposibleng wala siyang suweldo kasi may pinipirmahan siyang voucher, nagpapapirma kami.”

Apat na taon daw tumagal ang PA kina Nina, ”actually dati kay King (kapatid na singer din ni Nina) siya, mga 2005, tapos nagpaalam na siyang (PA) aalis noong 2009, kaya apat na taon. Okay naman, eh.”

Samantala, can afford naman magbayad ni Nina ng suweldo kasi base sa kapatid niyang si Dew Anne ay marami pa raw shows ang Soul Siren.

Sa palagay mo ateng Maricris, sino ang nagsasabi ng totoo, ang PA o ang manager cum sister ni Nina?

Reggee Bonoan