Mag-iina minasaker sa South Cotabato

KORONADAL CITY – Nakahandusay at wala nang buhay ang tatlong miyembro ng pamilya Recomite sa Prk. Ubas, Bo. 5, Banga, South Cotabato makaraan pagsasaksakin ng hindi pa nakikilalang mga suspek kahapon ng umaga.

Ayon kay Barangay Kapitan Amado Villacanas ng Bo. 5,  duguang natagpuan ang magkapatid na sina Edward alyas Wating at Metchie gayondin ang kanilang ina na si Cresencia “Cresing” Recomite.

Ayon kay Kapitan Villacanas, tadtad nang saksak sa katawan ang mga biktima na naging dahilan ng kanilang kamatayan.

Nakita ang bangkay ni Edward sa labas ng kanilang bahay habang sa sala si Cresensia at ang bangkay ni Metchie ay sa kusina malapit sa pinto.

May natagpuang kutsilyo sa pinangyarihan ng krimen na hinihinalang ginamit sa pananaksak.

Pinaniniwalaang 10 p.m. hanggang 11 p.m. kamakalawa nangyari ang insidente dahil natuyo na ang dugong nagkalat sa kanilang bahay.

Tanging ang 10-anyos na si Carlo ang survivor sa krimen na dinala sa pagamutan.

Habang ang padre de pamilya ng mga Recomite na si Rustico, dating pulis at ex-kapitan ng nabanggit na barangay, ay matagal nang pumanaw.