Sa U.S. may armadong seguridad sa mga simbahan

 

PATAPOS na ang Sunday service, ngunit bago ito magwakas, pinangunahan ni Bishop Ira Combs ang kanyang kongregasyon ng 300 katao sa Greater Bible Way Temple sa panalangin. Ang pamamaril na pumatay sa siyam na indibiduwal sa Charleston church ay hindi dapat maganap dito, tiniyak niya sa kanyang mga pinapastol.

“Kung mayroon kaming seguridad, hindi sana nakapag-reload ang gunman,” deklara ni Combs. “Lahat tayong naririto ay hindi ibibigay ang kabilang pisngi habang binabaril.”

Habang nagbibigay ng banal na aral, nakapuwesto sa kanya ang dalawang lalaki sa magkabilang gilid ng pulpito, parehong armado ng mga baril sa ilalim ng kanilang suit coat. Ang iba pang mga miyembro ng simbahan ay ipinakalat sa paligid bilang security team.

Walang alam ang mga sumamba kung sino-sino ang armado at kung sino ang hindi – ito’y isang undercover approach na bahagi ng security plan ng Charleston church.

“Hindi kami naghahanap ng karahasan, pero ipapatupad namin ang batas,” ani Combs bago ang church service. “At mag-i-interdict kami kapag may taong dumating na may armas.”

Ang madugong pamamaril sa simbahan sa Charleston, South Carolina noong Hunyo 17 ay nagbunsod ng mainitang debate ukol sa tinaguriang ‘hate crimes,’ ang paglalagay ng Confederate flag, at gun control.

Noong 2013, isang lalaki ang bumaril kay Ronald Harris, isang pastor sa Lake Charles, Louisiana, habang nagsesermon sa mga nagsisimba. Isang taon bago nito, isa ring gunman sa Sikh Temple sa Oak Creek, Wisconsin, ang pumatay sa anim na tao. Kasunod nito noong 2009, isa pang small-town pastor, si Fred Winters ang binaril habang nangangaral sa pulpito sa kalagitnaan ng morning service sa Maryville, Illinois.

Kinalap ni Tracy Cabrera