Blackwater vs. NLEX

NANGANGANIB na mabigo ang ambisyon ng Talk N Text para sa ikalawang sunod na kampeonato at kailangang maipanalo nila ang kanilang huling laro kontra KIA Carnival upang magkaroon ng tsansang pumasok sa quarterfinals ng PBA Governors Cup.

Magtutuos ang Tropang Texters at Carnival mamayang 4;15 pm sa Smart Araneta Coliseum sa Quezon City.

Magkikita naman sa 7 pm main game ang NLEX at Blackwater na kapwa nabigo na makausad sa quarterfinals.

Nalasap ng Tropang Texters ang ikaanim na pagkatalo sa sampung laro nang sila ay durugin ng defending champion Star Hotshots, 105-93 noong Martes.Kung matatalo sila mamaya ay malamang na malaglag na sila.

Ang KIA ay galing sa back-to-back na pagkatalo sa Globalport (102-94) at Rain Or Shine (9490) at katabla ng Star sa ikapitong puwesto sa record na 4-5. Ang huling laro ng Carnival ay laban sa Meralco sa Hunyo 24 kung kailan magtatapos ang elims.

Ang Talk N Text ay pinamumunuan ng mga imports na sina Steffphon Pettigrew at Sam Daghles na sinusuportahan nina Jayson Castro, Ranidel de Ocampo, Kelly Williams at Larry Fonacier.

Ang KIA ay binubuhat nina Hamady N’Diaye, Jet Chang, LA Revilla, Hyram Bagatsing, Leo Avenido, Mark Yee at Rich Alvarez.

Ang NLEX ay tinambakan ng Globalport, 108-80 sa kanilang huling laro at bumagsak sa 2-7. Kailangan na manalo ang Road Warriors sa kanilang huling dalawang laro kung hindi ay di sila aabot sa susuod na round. Ang kanilang huling kalaban ay ang Barangay Ginebra sa Hunyo 24.

Ang Blackwater ay nangungulelat at may iisang panalo sa siyam na laro. Makakatunggali pa nila ang Star Hotshots sa Martes. Ito ang ikatlong sunod na pagkakataong hindi nakarating sa quarterfials ang Elite.

Samantala, magtutuos ang league-leaders San Miguel Beer at Alaska Milk bukas ng 5 pm sa Panabo City Multi-purpose and Cultural Center sa Davao de Norte.

(SABRINA PASCUA)