Indonesia durog sa Batang Gilas

DINUROG ng Philippine national under-16 team, na mas kilala bilang Batang Gilas, ang Indonesia, 106-50, sa Cagayan de Oro para walisin ang oposisyon sa Southeast Asia Basketball Association (SEABA) Under-16 tournament.

Ang torneo ay nagsisilbing qualifying tournament para sa FIBA Asia Under-16 tournament na gaganapin sa Hulyo sa India, na kabibilangan ng top three teams na makakukuha ng slot sa regional competition.

Una rito, nasungkit ng Batang Gilas ang spot sa FIBA Asia U-16 tilt sa pa-mamagitan ng pagpapabagsak sa Thailand, 105-48, noong Biyernes nitong nakaraang linggo.

Dahil sa pagdomina sa Indonesia, nagawang walisin ng mga kabataang Pinoy ang kompetisyon at idepensa ang gintong medalya.

Tinalo rin ng Batang Gilas ang Brunei, 112-31, at Malaysia, 106-69, sa iba pang mga laban.

Nanguna para sa mga Pinoy si Sam Josef Belangel sa kanyang 18 puntos kontra sa Indonesia.

Makakasamang nakakuha ng slot sa FIBA Asia U-16 ang Malaysia (second place) at Indonesia (third place).

 

Kinalap ni Tracy Cabrera