HATAW! D'yaryo ng Bayan hatawtabloid.com
ni Sabrina Pascua
BUMABA na sa best-of-three ang PBA Commissioner’s cup semifinals series sa pagitan ng Talk N Text at Purefoods Star. Kaya naman mahalaga para sa dalawang koponan na makauna sa 2-1 kalamangan.
Inaasahang magiging mas pisikal at emosyonal ang sagupaan ng Tropang Texters at defending champion Hotshots sa Game Three mamayang 7 pm sa Smart Araneta Coliseum sa Quezon City.
Dinurog ng Tropang Texters ang Hotshots 92-77 sa Game Two noong Lunes upang itabla ang serye. Ang Hotshots ay nagwagi sa Game One, 100-94.
Sa panalo ng Talk N Text ay napatid ang seven game winning streak ng Purefoods Star. Kabilang sa streak na iyon ang 118-117 triple overtime na panalo laban sa Tropang Texters sa Davao City noong Marso 14.
Ang mananalo sa seryeng ito ay makakatunggali ng Rain Or Shine sa best-of-seven championship round. Nakamit ng Elasto Painters ang unang Finals ticket nang mawalis ang Meralco sa kanilang semifinals series, 3-0.
