Isang linggong sorpresa inihatid ng UH

PUSH NA’YAN
ni Ambet Nabus

BONGGANG mga sorpresa ang hatid ng Unang Hirit para sa masayang week-long anniversary celebration nito ngayong taon.

Last Monday ay bumisita ang PBB Collab Edition 2.0 ex-housemates na sina Marco Masa at Eliza Borromeo para ibahagi ang kanilang youthful energy pati na rin ang masasayang karanasan nila sa loob ng Bahay ni Kuya.

Napa-”Eyyyy!” naman ang lahat nang magpunta ang “All Purpose Queen” na si Kween Yasmin last Tuesday para maghatid ng good vibes sa viewers.

Noong Wednesday ay nasorpresa ang buong UH Barkada nang ipakilala bilang special hostmate si Alice Dixson. Naging mas espesyal pa ang umaga dahil sa pagharana ni Asia’s Limitless Star Julie Anne San Jose ng kanyang newest single, Simula. 

Isang fun Thursday morning naman ang bumungad sa viewers dahil sa pagbisita nina Christian Bautista at Mark Bautista. Lalo pang naging bright ang umaga dahil sa masayang kwentuhan at kulitan kasama si Pokwang.

Siyempre, bukod sa mga special guest ay hindi mawawala ang malalaking sorpresa at Pamaskong handog para sa mga Kapuso loyal viewers sa iba’t ibang lugar sa bansa.