HATAW! D'yaryo ng Bayan hatawtabloid.com
HINDI nakaligtasang isang public school teacher at kaniyang asawang seaman nang tupukin ng apoy ang kanilang bahay sa Brgy. Matalava, bayan ng Lingayen, lalawigan ng Pangasinan, nitong Sabado, 14 Setyembre.
Kinilala ng pulisya ang mga biktimang sina Wendy Repato, 35 anyos, isang seaman; at kaniyang asawang si Ronaly Repato, 31 anyos, isang guro sa pampublikong paaralan.
Lumalabas sa imbestigasyon na naunang maamoy ng ama ni Ronaly na si Roger de Guzman, na may nasusunog sa kanilang kusina dakong 2:40 pm kamakalawa.
Bago matupok ng apoy ang bahay, narinig muna ang malakas na pagsabog mula rito, ayon sa pulisya.
Bigong makalabas ang mga biktima na natutulog sa kanilang silid nang magsimula ang sunog.
Idineklarang fire out dakong 3:28 ng hapon.
Ayon kay Senior Fire Officer 2 Jaypee de Guzman, imbestigador ng Bureau of Fire Protection-Lingayen, patuloy ang kanilang pagsisiyasat upang matukoy ang pinagmulan ng sunog.
