Vhong nagpasalamat sa nakamit na hustisya

MA at PA
ni Rommel Placente

SA live presentation ng It’s Showtime noong Huwebes, nagpasalamat si Vhong Navarro sa nakamit na hustisya matapos lumabas ang hatol ng Taguig RTC, na pumabor sa kanya sa serious illegal detention case na isinampa niya laban kina Cedric Lee at Deniece Cornejo.

Binasa sa korte ng Taguig Regional Trial Court ang hatol na guilty kina Cedric at Deniece, pati na sa mga kapwa-akusado nilang sina Simeon Raz at Ferdinand Guerrero, noong May 2, 2024.

Pahayag ni Vhong, “Gusto ko munang [kunin] itong pagkakataon na ito para magpasalmat.

“Of course, maraming-maraming salamat, Lord, dahil lagi Kang nakagabay sa akin.

“Sa raming pinagdaanan ko sa buhay, nandiyan Ka. Ikaw naging sentro ko, at napakatotoo Mo. Kaya maraming-maraming salamat.

“And of course, maraming salamat po sa RTC Taguig Branch 153, kay Judge Bien, at sa lahat po ng staff ng court, sa ibinigay niyo pong justice sa akin, na matagal ko na pong ipinagdarasal. Salamat po ng marami.”

Pinasalamatan din ni Vhong ang kanyang legal team sa pamumuno ni Atty. Alma Mallonga gayundin ang ABS-CBN family na hindi tumalikod sa kanya.

Hindi rin nakalimutang pasalamatan ng TV host-comedian ang kanyang manager na si Chito Rono, ang kanyang mga ka-grupo sa Streeboys,mga tagahanga, at ang kanyang It’s Showtime family.