Government employee tinambangan ng riding in-tandem patay

Hindi na umabot ng buhay sa pagamutan ang isang empleyado matapos tambangan ang kinalululanan nitong sasakyan at pagbabarilin ng dalawang nakamotorsiklo sa San Rafael, Bulacan kamakalawa.

Sa ulat na ipinadala ng San Rafael Municipal Police Station (MPS) kay Police Colonel Relly B. Arnedo, provincial director ng Bulacan PPO, ang biktima ay kinilalang si John Emerson y Parfan, 33, government employee at residente ng Brgy. Tambubong, San Rafael.

Batay sa ulat, dakong alas-7:50 ng umaga, habang ang biktima kasama ang kanyang partner na si Concepcion Sherine Gonzales at isang Corazon Zafra ay lulan ng isang Toyota Avanza, kulay itim, na may plakang NDC 4879 at papasok sa trabaho, ay bigla na lang tumigil sa kaliwang bahagi (driver’s side) ng sasakyan ang dalawang armadong salarin na sakay ng isang Mio motorcycle kulay asul, na walang plaka at saka siya pinagbabaril.

Matapos isagawa ang krimen ay tumakas ang mga salarin papunta sa direksiyon ng San Ildefonso  samantalang ang biktima ay nagawa pang maisugod sa Ace Medical Center sa Baliuag, Bulacan subalit idineklara na itong patay.

Ang mga elemento ng San Rafael MPS ay kaagad namang nagsagawa ng hot pursuit operation upang matukoy ang kinaroroonan at makilala ang mga suspek habang ang SOCO team ay nagsagawa ng pagproseso. (MICKA BAUTISTA)