Joshua at Bella matagal at malalim na ang pagkakaibigan 

MA at PA
ni Rommel Placente

SA isang interview ng Filipinio-American singer at TikTok Superstar na si Bella Poarch, tinanong siya kung sino ang biggest Filipino crush niya, ang sagot niya ay si Joshua Garcia.

Nang ma-interview si Joshua sa TV Patrol at iparating ang paghanga sa kanya ni Bella, ang reaksiyon ng binata, masaya siyang malaman na humahanga sa kanya ang dalaga.

“She posted me before sa TikTok account niya and nag-comment din ako roon. Nakatataba lang din ng puso.

“Masaya ako siyempre, I’m happy na may nagsu-support o humahanga sa akin,” sabi ni Joshua.

Sa tanong kay Joshua kung crush niya rin ba si Bella, ang sagot niya ay, “Why not?”

Kinompirma rin ni Joshua na matagal-tagal na silang nag-uusap ni Bella at nagpaplano na rin silang magkita.

“Nagkakausap kami. Before pa ng June yata, dapat magkikita kami. Pero hindi natuloy ‘yung Star Magic tour ko, kasi hindi ako nakasama.

“Tapos parang July daw yata pupunta siya pero hindi rin naman natuloy. Hindi natin alam.”

Dagdag pa niya, “Ngayon, we’re good friends. Ngayon, okay kami, magkaibigan kami.”

Pag-amin din ni Joshua, matagal at malalim na ang kanilang naging pag-uusap ni Bella.

Umaasa siyang magkikita rin sila ni Bella sa binabalak nitong pag-uwi sa Pilipinas sa Disyembre.