Alex Castro nagpasalamat sa mga Bulakenyo 

PABONGGAHAN
ni Glen P. Sibonga

PUNO ng pasasalamat sa mga Bulakenyo ang aktor at Beautederm ambassador na si Alex Castro matapos opisyal na iproklama bilang nanalong Vice Governor ng Bulacan sa nakaraang eleksiyon. 

Masaya si Alex na nagwagi ang tambalan nila ng aktor din at incumbent Governor ng Bulacan na si Daniel Fernando.

Ayon nga sa post ni Alex sa Facebook, “Mga Bulakenyos maraming salamat po sa inyong tiwala at suporta asahan po ninyo na gagawin po namin ang lahat upang pag serbisyuhan ang bawat Bulakenyo at tugunan ang mga problema ng ating lalawigan.

“Ang tagumpay ng tambalang Fernando-Castro ay tagumpay ng bawat Bulakenyo. Sama-sama nating Baguhin ang Mukha ng ating Lalawigan. Godbless Bulacan! To God be the glory.”

Mula sa pagiging provincial board member ng Bulacan ay umakyat ng puwesto bilang Vice Governor si Alex. 

Tinitiyak ni Alex na dahil magkapartido at magkakampi sila ni Daniel bilang mga halal na Gobernador at Bise Gobernador ay magkasama nilang paglilingkuran nang maayos ang kanilang mga kababayan sa Bulacan.