HATAW! D'yaryo ng Bayan hatawtabloid.com
HATAWAN
ni Ed de Leon
“WALA pa sa sampung porsiyento ng dating nanood ng sine sa Metro Manila Film Festival ang pumasok sa sinehan kahapon,” pag-amin ng isang exhibitor.
Personal din namin itong nasaksihan nang mag-iikot kami sa ilang mall na wala nga halos nanonood ng sine. Maliwanag na nilangaw ang Metro Manila Film Festival at hindi lang isa kundi lahat ng entries. May mga sinehan pang nag-cancel ng screening, dahil kahit dapat nang magsimula ang pagpapalabas ng pelikula, wala pang pumapasok para manood.
Sinasabi nilang hindi takot sa Covid ang dahilan kung bakit flop ang MMFF. Puno ang mga simbahan. Dumagsa ang mga tao sa Luneta. Punopuno rin ng mga namamasyal ang Quezon Memorial Circle at marami ring mga tao sa mga mall mismo. Waiting ang mga gustong kumain sa mga restaurant. Nakapila rin ang mga papasok sa shops na naglilimita ng mga tao para maipatupad ang social distancing. Ano ang dahilan at nag-flop na naman ng ganyan ang MMFF?
“Hindi dahil sa takot sa Covid. Hinahanap nila iyong mga pelikulang comedy. Hinahanap nila ang mga sikat na artista. Gusto nila mga pelikulang mag-eenjoy sila. Ayaw nila sa mga indie,” ang maliwanag na sinasabi ng ilang theater personnel.
“Naglabas kami ng pelikulang Ingles, hindi ganoon karaming tao dahil sa safety protocols pero hindi naman ganyang wala talagang nanonood. Hindi sila natuto eh, ginawa na nila iyan five years ago, puro sila indie. Lahat naman nalugi. Ewan kung bakit ibinalik nila ngayon,” sabi pa sa amin.
“Naghahanap din ng artista ang mga tao. Gusto nila sina Vic Sotto, Vice Ganda, Coco Martin, eh walang ganoon eh. Ewan naman ang mga producer, kasi alam naman nila ang mga artistang pinanonood ng mga tao, Maski naman wala pang pandemya, mayroon talaga tayong box office stars. Kung ayaw nilang kumuha ng box office stars, huwag na silang mag-ambisyong lumabas sa sine. Sa internet na nga lang sila dahil doon sila lang ang malulugi, hindi kagaya niyan na nadadamay pa ang sinehan sa pagkalugi nila. Ang masakit, hindi nagbabayad sa sinehan iyan ng minimum guarantee dahil festival nga. Kung ganyan din lang, mas mabuti pa ngang magsara,” sabi pa ng isang inis na inis na exhibitor.
“Kami ang pinalalabas nilang kontrabida. Sinasabi nilang wala kaming malasakit sa pelikulang Filipino. Kagaya niyan palabas sila sa sinehan, ayaw silang panoorin ng mga tao, ano ang gagawin natin? Aasa kami na baka sakaling magkaroon ng milagro, kung hindi lugi kami ng sampung araw. Siguro ang bawi na lang namin paglalabas ng ‘Spiderman’ sa January 8. Pero itong festival na ito, wala na iyan,” sabi pa nila.
