Marjorie, may mga pasabog pa; Julia, kailangan ng matinding damage control

ANO na ang nangyari, natameme na ba si Marjorie Barretto at hindi na pinakawalan ang sinasabi niyang pasabog? Natameme na rin ba si Julia Barretto na sinasabi ng mga witness na nagsisisigaw pa noong nagkakagulo sa burol ng lolo niya?

Talagang dapat matameme na silang mag-nanay dahil kung pag-aaralan mong mabuti, ang tatamaan nang matindi niyan iyang si Julia. Siya iyong nag-aartista eh. Siya ang nanga­ngailangan ng public accep­tance. Dapat niyang ma-realize na mas sumikat si Gretchen Barretto at kuha niyan iyong nasa age level niya. Sumikat din nang husto si Claudine at naging totoong prime time queen noong araw. Matindi pa rin ang following niyan. Kung kakalabanin mo iyan, ano nga ba ang makukuha mong suporta eh hanggang ngayon naman starlet pa lang siya.

Hindi pa siya nakakawala sa dating controversy nila ni Bea Alonzo, at ano man ang sabihin niya, kung pakikinggan niya ang sinasabi ng netizens, dehado siya sa labang iyon. Mas nakalamang si Bea, na inaasahan naman dahil mas sikat talaga si Bea at mas maraming followers.

Paano siya makaaangat kung puro controversy na tagilid siya sa laban?

Kaya iyang panawagan niya sa “understanding”, “privacy” at “kindness” bahagi na iyan ng damage control. Hindi iyan ang isinisigaw niya kay Claudine noong inaaway nilang mag-nanay, na nakita at narinig ng maraming witness. Iba ang narinig na dalawang beses niyang isinigaw noong unang awayan. Ayaw na lang naming sabihin kung ano, kasi hindi kami nagsasalita ng ganoon.

Eh ngayon may project pa pala siya. Kailangan talaga ang matinding damage control. At ang unang magandang magagawa nila, tumameme na lang muna.

HATAWAN
ni Ed de Leon