Agham road sinakop ng Kadamay

LIBO-LIBONG mga miyembro ng urban poor group na Kalipunan ng Damayang Mahihirap (Kadamay), ang lumatag at inokupahan ang Agham Road sa Quezon City bilang paghahanda sa kilos protesta sa Labor Day.

Sinabi ni Carlito Badion, secretary general ng Kadamay, nasa 5,000 miyembro ang nagtipon-tipon sa northbound lane ng Agham Road.

Nabatid sa ulat, sini-mulan okupahin ng mga miyembro ng Kadamay ang nasabing lugar nitong Sabado ng gabi.

Ang mga miyembro ng grupo ay nagtayo ng tent at doon natulog.

Ayon kay Budion, mananatili sila roon at aalis ngayong Lunes para lumahok sa kilos-protesta.

Samantala, pinayuhan ng Metropolitan Manila Development Authority (MMDA) ang mga moto-rista na iwasan ang Agham Road, na sarado na dahil inokupahan ng mga miyembro ng Kadamay.

3,000 PULIS ITATALAGA
SA LABOR DAY
PROTESTS – NCRPO

KINOMPIRMA ni National Capital Region Police Office (NCRPO) director, Chief Supt. Oscar Albayalde, nasa 3,000 pulis ang kanilang ide-deploy para magbigay seguridad lalo sa magsasagawa ng kilos protesta ngayong Labor Day.

Sinabi ni Albayalde, ang 2,000 pulis ay magmumula sa Manila Police District (MPD), habang ang 1,000 ay mula sa Regional Public Safety Battalion.

Sinabi ni Albayalde, kahit tapos na ang ASEAN Summit, nananatiling nasa full alert status ang Kalakhang Maynila hanggang ngayong 1 Mayo, Labor Day.

Una rito, inihayag ng labor group na Kilusang Mayo Uno (KMU), 3,000 miyembro nila ang magsasagawa ng kilos protesta na sasamahan ng grupong Kalipunan ng Damayang Mahihirap (Kadamay) na 5,000 ang mga miyembro.

Pagtiyak ng PNP, maximum tolerance ang kanilang ipatutupad laban sa mga raliyista.

Ayon sa heneral, kanilang inirerespeto ang mga rally basta huwag lamang manakit at manira ng mga ari-arian.

Inilinaw ni Albayalde, puwedeng magsagawa ng kilos protesta ang mga militanteng grupo sa freedom parks, kabilang ang Liwasang Bonifacio sa Maynila.

Aniya, mahigpit na i-pinagbabawal ang pagsasagawa ng rally sa harap ng United States Embassy sa bahagi ng Roxas Boulevard.