Traffic auxiliary tigbak sa truck

BINAWIAN ng buhay ang isang 44-anyos skyway traffic auxiliary nang mabundol at masagasaan ng isang truck habang nagmamando ng trapiko sa San Andres, Maynila kamakalawa.

Hindi na umabot nang buhay sa Philippine General Hospital (PGH) ang biktimang si Ricardo Fullece, 44, residente sa Buli, Muntinlupa City.

Agad sumuko makaraan ang insidente ng suspek na si Marjoe Marabe, 36, driver, at residente sa Barcelona St., Tondo, Maynila

Sa imbestigasyon ni SPO3 Bert Francisco, ng Vehicle Traffic Investigation Section (VTIS) ng Manila Police District (MPD) – Special Investigation and Detection Branch, dakong 12:10 am, nagmamando ng trapiko ang biktima sa intersection ng Quirino Avenue at Pedro Gil St., sa San Andres, nang bigla siyang mahagip ng hulihang gulong ng trailer (NUM-180) na hinihila ng Fuso tractor head (097437) at minamaneho ng suspek.

Pagkaraan ay nabuwal ang biktima at nasagasaan ng hulihang double tire wheel sa ibabang bahagi ng kanyang katawan.

Sasampahan ng kasong reckless imprudence resulting in homicide ang suspek.

(LEONARD BASILIO, may kasamang ulat nina Maribeth Barines, Jam Breboneria at Ruth Liman)