Sariling pamilya sinilaban ng ama 1 patay, 3 sugatan

LA UNION – Namatay habang ginagamot sa ospital ang isang padre de pamilya bunsod ng third-degree burns habang sugatan ang kanyang misis at dalawa nilang anak makaraan sunugin ang kanilang bahay sa Brgy. Maria Cristina West, Bangar, La Union kamakalawa.

Ayon sa ulat, pasado 11:00 pm habang umiinom ng kape ang mag-asawa nang sabihin ng ginang na nais niyang bumalik sa ibang bansa upang magtrabaho ngunit nagalit ang mister bunsod nang matinding selos.

Pagkaraan, binuhusan ng gasolina ng mister ang sarili gayondin ang kanyang misis at sinilaban.

Tinangkang tumakbo ng ginang kasama ang dalawa nilang anak na may gulang na 4-anyos at 10-anyos ngunit nahila sila pabalik ng mister.

Nakatakbo palabas ang dalawa pa nilang anak na may gulang na 7-anyos at 12-anyos na siyang humingi ng saklolo sa kanilang mga kapitbahay.

Mabilis na kumalat ang apoy sa buong bahay na gawa sa light materials at dakong madaling-araw nang maapula ng mga bombero.

Binawian sa insidente ang mister habang nilalapatan ng lunas sa pagamutan ang kanyang mag-ina na dumanas ng first at second degree burns sa kanilang katawan.