ASG members ‘sabog’ sa shabu

ZAMBOANGA CITY – Sentro rin sa kalakaran ng teroristang Abu Sayyaf group (ASG) ang ilegal na droga na kanilang ginagamit sa kanilang operasyon sa mga lalawigan ng Sulu, Basilan at iba pang mga karatig na lugar.

Ayon sa Joint Task Force Sulu, ito ay base sa nakukuha nilang mga impormasyon at nabatid na isa ang droga sa mga pinagkukunan nila ng pondo para sa pag-recruit ng mga kabataan na sumali sa kanilang grupo.

Bukod dito, lulong anila sa droga ang mga bandido kaya hindi natatakot sa pakikipaglaban sa mga sundalo sa mga bulubunduking lugar.

Ganito rin ang rebelasyon ng mga naging biktima ng pagdukot ng Abu Sayyaf na tuluyan nang nakalaya.

Isa na rito ang Indonesian kidnap victim na si Herman Bin Manggak na kamakailan lamang ay nakalaya mula sa kamay ng Abu Sayyaf.

Ayon sa kanya, nakikita niya mismo kung paano gumagamit ng shabu ang pitong miyembro ng Abu Sayyaf na siyang nagbabantay sa kanya.

Nakarekober ng mga shabu at mga drug paraphernalia ang mga sundalo sa mga nahuhuli at napapatay nilang mga Abu Sayyaf members.

Naniniwala ang militar, ang “proliferation” ng ilegal na droga sa ZAMBASULTA area (Zamboanga, Basilan, Sulu, Tawi-Tawi) ay may koneksyon sa kalakaran ng Abu Sayyaf na may kaugnayan din sa malalaking drug lords sa bansa.