P3.5-T 2017 budget ipinanukala ng Duterte admin

 KABUUANG P3.35 trilyon hanggang P3.5 trilyon ang ipanunukalang 2017 national budget ng Duterte administration.

Sinabi ni incoming Budget Sec. Benjamin Diokno, sinisimulan na nilang balangkasin ang hihilinging budget sa Kongreso para maisumite agad ito pagkatapos ng unang State of the Nation Address (SONA) ni President-elect Rodrigo Duterte.

Ayon kay Diokno, kailangan nila ang nabanggit na budget para masimulan agad ang mga programang nais ipatupad ni Duterte.

Malaking bahagi aniya ng pondo ay gagamitin sa mga impraestruktura na nasa P1 trillion, at walang mangyayaring underspending para makasabay ang Filipinas sa mga kalapit-bansa.

Mahalaga aniyang mapaganda ang mga paliparan, pantalan, mga kalsada at dagdag na linya ng mga tren dahil napag-iiwanan na ang bansa kompara sa ibang bansa sa Asya.

Tiniyak din ni Diokno, naaayon sa Supreme Court (SC) ruling sa Disbursement Accelaration Program (DAP) ang hihilinging budget.