7 probinsiya storm signal no. 1 sa bagyong Ambo

INAASAHANG magla-landfall ngayong araw sa Aurora province ang bagyong Ambo.

Una rito, inianunsiyo ng Pagasa, ganap nang bagyo ang binabantayang low pressure area (LPA) at isa na itong tropical depression na namataan sa silangan ng Borongan City.

Ayon sa Pagasa, namataan ang bagyong Ambo sa layong 182 kilometro silangan ng Virac, Catanduanes.

Taglay nito ang lakas ng hangin na 45 kph malapit sa gitna at inaasahang gagalaw patungong west north-west sa bilis na 19 kph.

Dahil dito, isinailalim ang pitong lalawigan sa public storm warning signal number 1, kabilang ang Catanduanes, Camarines Norte, Camarines Sur, Northern Quezon kasama ang Polillo Islands, Aurora at Quirino.

Asahan anila sa nasabing mga lugar ang pag-ulan at malakas na hangin ngayong araw habang kahapon ay nagsimula nang makaranas nang malakas na ulan sa bahagi ng Central Luzon, CALABARZON at Bicol Region.

Ang bagyong Ambo ang kauna-unahang tropical cyclone na pumasok sa Filipinas ngayong 2016.