‘Mariposa children’ sinagip sa bangka (Sa Roxas Blvd.)

TINATAYANG 20 kasapi ng ‘Mariposa’ ang sinagip ng mga tauhan ng Manila Department of Social Welfare Office sa mga nakahimpil na bangka sa Manila Bay sa Roxas Blvd., Maynila nitong Martes.

Kabilang sa nailigtas ng Manila Department of Social Welfare Office, Manila Police District, Metro Manila Development Authority (MMDA) at Philippine Coast Guard (PCG) ang limang batang babae at isang batang lalaki na pinaniniwalaang ginagamit ng sindikatong Mariposa.

Ayon kay Lindsay Javier, team leader ng Rescue District 5 ng Manila SWO, may natanggap silang impormasyon na ibinubugaw ang mga batang babae sa mga turistang  nasa yate habang ang ibang mga bangkero ay nagsisilbing courier ng droga.

May mga tumalon sa dagat para makatakas sa operasyon ng mga awtoridad ngunit nahuli rin sila ng mga tauhan ng PCG.

Kinompiska ng mga awtoridad ang mga bangkang ginagawang tirahan.

Kinuha rin ng Veterinary Inspection Board ang mga alaga nilang aso.

Mula ang mga pamilya sa Cavite at Pasay City at dadalhin sa Manila Reception Center para tulungan.