Rebelde todas, 1 sugatan sa sagupaan sa Agusan Sur

BUTUAN CITY – Kinikilala pa ang bangkay ng isang rebelde na narekober makaraan ang pakikisagupa sa militar sa Purok 9, Tiniwisan, Brgy. San Jose, sa bayan ng Prosperidad, sa lalawigan ng Agusan del Sur kamakalawa.

Ayon kay Capt. Jasper Gacayan, public information officer ng 401st Brigade Philippine Army, nakasagupa ng 3rd Special Forces na kasama sa Law Enforcement Operation, ang tinatayang 40 miyembro ng Guerilla Front Committee 8 ng NPA sa loob ng 30 minuto.

Walang naitalang casualty sa panig ng mga sundalo ngunit naiwan ang isang bangkay at isang sugatan na rebelde.

Habang narekober ng tropa ang isang unit ng AK-47 at isang unit ng M16 rifle.

Nasa pribadong punerarya na ang bangkay habang ginagamot ang sugatang rebelde.

Samantala, puspusan ang nagpapatuloy na hot pursuit operation ng mga militar.