Reporter, cameraman bugbog-sarado sa mayoralty supporter (Sa Zambo Sibugay)

ZAMBOANGA CITY – Bugbog-sarado ang isang reporter ng local television station na nakabase sa Pagadian City at ang kanyang cameraman makaraan kuyugin ng supporters ng isang mayoralty aspirant.

Kinilala ang reporter na si Jay Apales habang ang kanyang cameraman ay si Clint John Ceniza, nagtatrabaho sa local station na TV-One sa Pagadian City.

Ayon sa ulat mula sa Pagadian City, bumiyahe ang mga biktima papunta sa bayan ng Buug sa lalawigan ng Zamboanga Sibugay para mag-cover ng halalan roon.

Kumukuha ng footage ang cameraman nang lapitan ng mga supporter ng mayoralty aspirant at pinigilan ngunit hindi nakinig ang mga biktima.

Bunsod nito, nagalit ang mga supporter at binugbog ang mga biktima.

Bukod dito, inagaw rin ng mga suspek ang camera at iba pang mga kagamitan ng dalawang biktima at winasak.

Tinutukan sila ng baril ang nagbantang sila ay babarilin kung hindi aalis sa lugar.

Nakabalik na ang mga biktima sa Pagadian City ngunit hindi pa mabatid kung magsasampa sila ng reklamo laban sa naturang mga supporter ng mayoralty aspirant.