HATAW! D'yaryo ng Bayan hatawtabloid.com
HATAW News Team
MARIING ipinahayag ng National Capital Region Police Office (NCRPO) na mahigpit na ipatutupad ang “no permit, no rally” policy sa pagdiriwang ng ika-40 anibersaryo ng EDSA People Power Revolution sa Miyerkoles, 25 Pebrero.
“Ipatutupad natin ang no permit, no rally since kailangan natin makapag-prepare dahil dalawang malaking pagtitipon ito,” pahayag ni NCRPO spokesperson PMaj. Hazel Asilo sa panayam sa isang estasyon ng radyo.
Ayon kay Asilo, kailangan ipatupad ang polisiya dahil dalawang malalaking grupo ang magsasagawa ng magkahiwalay na protesta bukod sa plano ng iba pang sektor na lumahok sa Trillion Peso March sa Miyerkoles upang labanan ang korupsiyon sa gobyerno at isulong ang panawagan na wakasan ang political dynasties.
“Ang nabigyan ng permit ay isang grupo mula sa Trillion Peso March Movement, para mag-conduct ng programa sa White Plains,” ani Asilo.
Ngunit sa social media post ng Koalisyon Makabayan, kanilang itutuloy ng protesta may permit man o wala.
“EDSA People Power never needed a permit, we won’t too. Tuloy ang protesta sa Pebrero 25!” nakasaad sa post ng Koalisyon Makabayan.
Ipinag-utos na ng pamunuan ng PNP na magtalaga ng 14,000-puwersa ng pulisya para ikalat sa mga lugar kung saan hihimpil o magmamartsa ang mga protesta.
