HATAW! D'yaryo ng Bayan hatawtabloid.com
MATABIL
ni John Fontanilla
WAGI ang representative ng Pilipinas na si Arabelle Manalo Dela Cruz aka Laguna Diva sa katatapos na Veiled Cup na ginanap sa Seoul, South Korea noong February 1, 2026.
Tinalo nito ang iba pang mga representative mula sa Asian Countries, maging ang dalawa pang naging representave ng Pilipinas na sina Garette Bolden at Thea Ashley na maagang namaalam sa kompetisyon.
Sa grand finals ay inawit nito ang kanta ni Michael Buble na Feeling Good at napabilib nito ang mga hurado sa ganda at husay ng pagkakanta sa nasabing awitin.
Post nga nito sa kanyang Facebook account:
“Pilipinas, panalo tayo!
“Unang una sa lahat, nagpapasalamat ako sa Panginoon na biniyayaan Nya ako ng buhay at talentong naibabahagi ko sainyo ngayon.
“Maraming salamat sa pamilya ko na nandyan magmula ng mag umpisa ako hanggang ngayon at walang sawang sumusuporta sa mga nais ko sa buhay. Mahal na mahal ko kayo!
“Sa mga kaibigan ko at mga taong sumusuporta sa akin, hindi ko man kayo maisa isa, lubos akong nagpapasalamat dahil ipinaramdam nyo sa akin na hindi ako nag iisa. Lalo na sa labang ito.
“Marami na akong nasalihan na kompetisyon sa buhay ko, karamihan pa roon ay hindi pinalad. Pero maraming naging aral sa akin lahat ng napagdaanan ko na yun. I am always grateful. And I will always be. Dahil hindi ako magiging si Arabelle ngayon kung hindi nangyari lahat ng yun.
“Mula sa batang nangangarap na marinig ng lahat, nabigyan na sya ng panahon ngayon!
“Hindi ko lang panalo ito. Para ito sa lahat ng taong nagtitiwala sa akin at nangangarap na katulad ko! Mahal ko kayo!
“Ako si Arabelle Manalo Dela Cruz aka Laguna DivaVeiled Cup 2026 Grand Champion
#ArabelleDelaCruz #LagunaDiva #VeiledCup.”
Ang kauna-unahang international edition ng South Korean singing competition, ang Veiled Cup ay inorganisa ng Seoul Broadcasting System (SBS), hosted by Lee Da-hee at ang Pilipinas ang unang nagwagi.
