Unang Top 8 finish mula 2010 World Championship
Bulgaria, pinatumba ang Portugal para sa quarterfinals

IPINAGPATULOY ng Bulgaria ang kanilang malakas na kampanya, matapos talunin ang Portugal sa straight sets, 25-19, 25-23, 25-13, upang makapasok sa quarterfinals ng FIVB Volleyball Men’s World Championship 2025 noong Lunes sa SM Mall of Asia Arena.


Isang makasaysayang gabi ito para sa koponang mula Silangang Europa, dahil ito ang kanilang unang top 8 finish mula pa noong 2010 World Championship sa Italy. Ang panalo rin ay nagpapanatili sa kanilang perpektong rekord na 4-0 sa 32-nation tournament.


Maliban sa bahagyang pagsubok sa ikalawang set, hindi pinayagan ng Bulgaria na makabawi ang Portugal, na tinapos nila sa pamamagitan ng matinding 18-6 run sa huling set. Sina Martin Atanasov, Aleks Grozdanov, at Aleksandar Nikolov ang nanguna sa surge na nagselyo ng panalo.


Ang nakatatandang Nikolov ay nagtala ng game-high 19 puntos mula sa 17 attacks, isang block, at isang ace, bukod pa sa walong excellent digs. Siya rin ang nag-iisang double-digit scorer ng Bulgaria sa mabilis na laban na tumagal lamang ng isang oras at 19 minuto.


“Ayos! Sobrang proud ako sa team. ’Yun lang ang masasabi ko. Ayokong mauna sa takbo ng laro, pero kumpiyansa kami. Lalaban kami ng todo sa quarterfinals,” sabi ng 23-anyos na outside hitter.


Samantala, mahusay namang pinatakbo ni Moni Nikolov ang opensa, matapos makapagtala ng 23 excellent sets. Sina Atanasov at Grozdanov ay nagbigay ng solidong suporta na may siyam at walong puntos, ayon sa pagkakasunod, sa laban sa Round of 16.


Ipinakita ng Bulgaria ang kanilang dominasyon sa net sa buong laban, kung saan nalampasan nila ang Portugal sa attacks, 37-23, at sa blocks, 11-2. Kitang-kita ang lakas ng opensa at depensa ng koponan sa itaas ng net, na hindi pinayagang makaangat ang Portugal.


“Napakahalaga nito, dahil sa lahat ng trabaho naming inilaan. Sa tingin ko, nagsisimula ng bagong proseso ang aming federation at national team, at ang pag-abot sa quarterfinals ay patunay ng aming pagsisikap. Masaya ako na narito kami,” ani pa ng mas batang Nikolov.


Target ngayon ng Bulgaria ang makapasok sa kanilang kauna-unahang World Championship semifinal sa loob ng 19 na taon, sa pagtapat nila sa pagitan ng Estados Unidos o Slovenia sa quarterfinals sa Huwebes.


Para sa Portugal, nagtapos ang kanilang kampanya sa Round of 16, kasabay ng pagtatapos ng kanilang pagbabalik sa World Championship matapos ang mahigit dalawang dekada.


Ang huling pagkakataon nilang makarating sa top 8 ay noong 2002.


Walang manlalaro mula Portugal ang umabot sa double digits, na sina Nuno Marques at Lourenco Martins lamang ang nanguna sa kanilang team na may tig-anim na puntos — isang malayong performance kumpara sa kanilang ipinakita noong pool phase, kung saan nag-a-average si Marques ng 15.35 puntos kada laro, at si Martins
ng11. (FIVB MWCH 2025 LOC)